آخر الأخبار
عاجل

من هو (الوزير ابو ريحه) .. يا فارس الحباشنة ...؟؟!!

من هو (الوزير ابو ريحه) .. يا فارس الحباشنة ...؟؟!!
الشريط الإخباري :  

حسن صفيره
اليوم نويت التزهزه واحكي باشي مختلف وبالعامية كمان بعد ما قززناكم سواليف عن الفساد وقرف رفع الكاز والبنزين ومعاناتنا من صوبة الغاز والكاز والبتوغاز بهالشتاء اللي اجانا بحسنة جيرانا ومش راح احكي عن الخبز وسعره وقديش الحكومة بتلهف من حقه ولا عن مشروع الباص السريع "البطيء" وعهره وقرفه وكمان ما راح انكد عليكم واجيب سيرة ديوان الهملة عفوا الخدمة المدني وكيف انه من برا رخام ومن جوا اسخام وللي بده وظيفه بزيد همه وبوعدكم ما اتكلم لا عن نقص خدمات الصحة ولا خراب البلديات ولا زيادة نسب البطالة ولا الجامعات وبلاويها وكيف حطوا الرؤساء فيها .

اليوم كنت اراجع بقفشات حبيبي وزميلي فارس ابن الحباشنة على صفحته الشخصية وعلى رأي الكركية وانا ألدّ عليها لفت نظري وكأنه عيون فارس قدامي وهو بحكي عن وزير بلقب "ابو ريحه" وصار مخي يروح شمال ويجي يمين وصرت ما بين نفسي اتحزر مرة اقول وزارة خدماتية ومرات يودني عقلي التنح على وزارة سيادية طب يا فارس ليش هيك بتعمل فينا ولا روحتك على البحر الميت خلتك تهبلنا وتحيرنا وبدكم الصراحة حاولت اطنش وانسى موضوع الفزورة وبعد دقيقتين رجعت افكر بريحة الثم ولا الاباط ولا الرجلين ولا الريحة كلها معجوقة .

المهم فشلت في المعرفة مش لشي بس لانه في اكثر من واحد بحكويلي انه ريحته طالعة ما علينا وعشان ارتاح وآكل تفاح وما يجيني رياح امسكت التلفون ورنيت على الحباشنة وبعد سواليف عن عيد الميلاد ومحمود المجالي وتلفزيون المملكة (هيك شغل الاستدراج) وسألته عن فرعون ونفرتيتي وابو الهول والمغطس والخصاونة والسهاونة وعن اكلة البرغل والنفاخ وعلى سيرة النفاخ والمعط والطقع سألته عن الوزير ابو ريحة ساعتها ضحك فارس والله لا يورجيكم ضحكة فارس وجوابني يا ابو عامر صارلك ساعة بتلف وبتدور عشان تعرف اسم الوزير ولعلمك انا صاحيلك وراح اخليها بنفسك وما راح احكي اسمه بس هو اكيد بعرف حاله .

هذه المادة ستبقى مفتوحة وبرسم الاجابة والرد إما من الزميل فارس الحباشنة يعلمنا مين المقصود وشو هي نوع الريحه وهي خامة ولا مليحه او ان يتحلى الوزير ابو ريحه نفسه ويخبرنا عن حاله وبعدها مالنا وماله او اننا سنضطر آسفين للتعاون مع الشرطة لارسال احدى الكلاب المتخصصة بالشم لاستخراج ومعرفة وزير الريحه ولا غلبنا وخلا من هالحكاية فضيحه 

وتوتو توتو خلصت مؤقتا الحتوته